Por: Marciano Ramos Moreira*
Era inda antis di Indipendensia i Pantxolu di Txika era imigranti la pa Purtugal. Dipos di alguns anu la, un parenti disel ranja-l un bon trabadju la Fransa. El txiga Fransa ki el txiga, el kaza, pa prokurason, ku Txuka nha Bia, ki ta staba li na Kabu Verdi. Txuka ba Fransa alguns dia dipos di kazamentu.
Na kel dia ki Txuka txiga Fransa, Pantxolu leba-l un ristoranti finu. Pantxolu inda staba ta tio-to na franses. Na verdadi, omi ka sabeba inda franses. Mas el staba la so na bazofaria dianti di se mudjer ta tenta konvense mudjer ma el sabeba franses. Di ses meza, Pantxolu faze garson sinal pa aprosima di es. Kantu garson txiga, Pantxolu fla-l:
– Deux la sopá!
Garson faze sinal ku kabesa ma dja el ntende pididu, bai, traze sopa pa Pantxolu ku se mudjer. Pantxolu volta, bazofu, pa se mudjer:
– Bu staba ku seka pa nu pidi nha primu Txiku pa ben ku nos ristoranti ma N ka sabe franses. Nen si e so ku fomi go, nu ka ta volta oxi pa kaza!
Kantu es kaba toma sopa, Pantxolu, inda ku mas mural, faze sinal pa garson txiga pertu ses meza:
– Deux la filetí di atun!
Garson torna anota pididu, bai, traze fileti di atun pa es dos. Go ki Pantxolu fika rei di bazofu:
– Ka dja N flaba-bo?! Dja N sa ta dizenraska na franses dretu! Djuntu ku mi, dja bu ka ta roka li na Fransa!
Pantxolu ku Txuka staba ku fomi i kumida staba sabi. Nun uas, es linpa ses pratus. Pantxolu txoma garson:
– Deux la pudin di keijó!
Garson, ki kaba pa ntende spiki di Pantxolu, kreba ser kunplisi di Pantxolu na speransa di resebe un bon gurjeta. Pur isu, ku rostu kontenti, el torna rabiska na kaderneta, bai, traze 2 pudin di keiju. Pantxolu bira tantu bazofu ki ti aula di franses el komesa ta da Txuka:
– Minina, franses e ka difisil, nau! Franses e kuazi sima nos lingua. So ki, na nves di Fransezis fla Txuka, es ta fla la Txuká, na nves di Maria, la Mariá, na nves di banana, la bananá, na nves di keiju, la keijó, i asin pur dianti. Spera bu ta odja! Dentu faxi, bu ta sta ta papia franses sima Fransezas! Ka bu fadiga. N ta nxina-bu!
– Sin, bo propi ki ta nxina-m! Bo ki, antis di bu benba Fransa, bu ka sabeba fla nen “aian” na franses. Inda bu ka ten nen 2 mes li, bu ta ben nxina-m franses!? Mos, abo e bazofu sima bu pai, Txeka!
Pantxolu staba sabi! Dja es kumeba ben kumedu. Da-l gana ba kaza ku se mudjer pa el ba kaba mata sodadi:
– Garson, la kontá!
Garson bai i ben ku konta dentu faxi.
Pantxolu era bazofu, mas el era txipi sen manha. Dipos di tenta konfiri tintin pa tintin tudu kuza ki podu na konta, dipos di soma tudu, di tra prova di novi pa sertifika, el po dinheru rautau – nen un binten di gurjeta, el ka poi.
Kantu Pantxolu dja paga, es komesa, el ku se mudjer, pripara pa sai di ristoranti:
– Nha mudjer, ti ki Pantxolu, maridu nha, konbida-nha pa un ristoranti manhan, nha pode bai sen medu pabia dja el sa ta papia franses ki nen papagaiu di Fransa!
Pantxolu ta papiaba un bokadu rixu. Garson staba, desdi prinsipiu, ta obi bazofarias di Pantxolu. Garson ben pa meza di Pantxolu ku Txuka, pega dinheru, konta, torna po dinheru riba meza, djobe, ku rostu rufadu, Pantxolu dentu di odju tan, dipos fla-l, na lingua kabuverdianu krankran:
– Bo propi ki ta papia franses! Txipi di N ka sabe kuze! Nhu po gurjeta faxi so! Si ka era mi, nhos ta kumeba la merdá!
Marsianu nha Ida padri Nikulau Ferera
