Por: Marciano Ramos Moreira*
Txiku Donga dja staba ku mas di 40 anu na korpu. Omi era amigu di se grogu.
Kel dia dentu tardinha, Txiku Donga staba moku, boka na txon. El staba dentu ribera ta ben di un fornadja. Txiku pasa djuntu di un tanki ki staba kuazi xeiu di agu. Bera kel tanki staba un monti algen di un relijion ki ta mete kabesa di ses fiel dentu di agu pa batiza-s.
Txiku sa ta benba ta da di banda, ta papia el so. Mas kantu el odja gentis ki ka era di se ribera, el kala boka – omi staba fusku, mas el ka kreba pa forasterus fika ta pensa ma el e dodu. Nton, na ta pasa djuntu kes genti, Txiku rapara ma kes genti staba na bixa, ta ba un un entra na tanki. Txiku (ki ka sabeba ma ta ezisti relijion ki ta batiza algen dja grandi i di kel manera – ku kabesa dentu di agu) fika kuriozu:
– Mas kuze ki kes genti la sa ta faze? Manba es sta kenti sima mi, es sa ta ba freska kabesa dentu agu tanki?
Txiku fika ku gana da fe. El txiga mas pertu di tanki. Nton, el odja ma staba, dentu tanki sakedu, un omi altaron i forti. Es omi altaron sa ta pegaba na totis di kada pesoa ki sa ta entraba na tanki, ta mete-l kabesa dentu di agu i, dipos, ta tra i ta purgunta rixu:
– Bu odja Jezus?
Pesoa ki metedu kabesa ku korpu ku tudu dentu di agu, ta djataba, ku folgu kansadu, enkuantu, ku tudu 2 mon, ta linpa rostu dundi sa ta pingaba agu manenti:
– Sin! N odjaaaaa-L!!!
Nton, tudu kes genti ki staba na roda di tanki, ta daba palma, ta gritaba, nun so vos, rixu tanbe:
– Aleluiaaa!!! Aleluiaaa!!! Aleluiaaa!!!
Kantu Txiku odja uns 3 pesoa ta ripiti ma dja es odja Jezus, Txiku fla pa se kabesa:
– Txiku, bo nunka bu odja Jezus. Oxi, dja bu atxa un xansi di konxe-L. Ka bu dexa es xansi skapa-bu!
Sima Txiku fla, asi ki el faze. Txiku faze sforsu pa el ka parse ma el staba txabesku, el ba fika rabuteki na fila, ku tudu konpostura, ketu ta spera se bes.
Gentis se frenti ba ta soti na tanki, ta metedu kabesa na agu, ta fla ma dja es odja Jezus. Sima gentis ba ta entra e asi ki Txiku ba ta fika kada bes mas ardigadu, ku gana di odja Jezus, el tanbe. Enbora omi ka era bador di grexa, kel ora go vontadi di odja Jezus subi-l kabesa.
Na fin, ben txiga bes di Txiku. Ku tudu konpostura, Txiku kanba na tanki, fika di sentidu sima tropa. Omi altaron sakedu dentu tanki pega Txiku na totis i txulufu – mete Txiku kabesa dentu di agu. Mete Txiku kabesa na agu, dipos tra Txiku kabesa di agu i purgunta Txiku:
– Bu odja Jezus?
– Nau! N ka odja-L. – Txiku kudi, ta tenta rekupera folgu, ta linpa, ku tudu 2 mon, rostu ki sa ta pingaba agu manenti.
Kontrariadu, omi altaron sakedu dentu tanki torna kasa Txiku totis ku se uma palma di mon direita i txulufu – mete Txiku kabesa dentu di agu otu bes. Mete Txiku kabesa na agu, dexa-l la ta toma foga un bokadinhu, dipos tra Txiku kabesa di agu i torna purgunta Txiku:
– Bu odja Jezus?
– Nau! Ka sta ningen baxu di agu. – Txiku kudi. Enfin, Txiku komesa diskunfia si bale pena tantu foga pa odja un Jezus.
Djentis komesa ta murmura, dja xatiadu ku es stranhu: tudu es odja Jezus, menus es stranhu, ki es ka sabe di undi kapri. Nfastiadu, omi altaron sakedu dentu tanki torna granpa Txiku totis i txulufu – mete Txiku kabesa dentu di agu mas un bes. Mete Txiku kabesa na agu, dexa-l la ta toma foga un bon bokadu, ti ki Txiku komesa ta barafusta ku brasus pa tenta futi di mon di kel omi altaron. Nton, omi altaron tra Txiku kabesa di agu i torna purgunta Txiku, ku vos di autoridadi:
– Dja bu odja Jezus?
– Nau! Bu ten serteza?! – Txiku (ki dja ka sa ta podeba sakedu dretu di tantu foga ki el leba di es bes) purgunta. Di es bes propi Txiku dja staba kuazi disididu na dizisti di konxe Jezus.
Kel omi altaron ki sa ta meteba gentis kabesa na agu, ku entoason di vos ki ta dexaba ntende ma dja el staba xatiadu ku es stranhu ki ka sa ta odjaba Jezus di nenhun jetu, purgunta tanbe:
– Serteza di kuze?!
Txiku (pa mostra stranheza ku purgunta di omi altaron), toma folgu, djobe pa rostus nfanhidu di tudu kes djenti, subi onbru, ragala odju, po kabesa di un banda, ponta ku tudu 2 mon pa agu, kudi:
– Ma Jezus kai lisin?!
Marsianu nha Ida padri Nikulau Ferera
