Por: Marciano Ramos Moreira*
Era un bes, tenba un mudjer ki txomaba nha Txika. El tenba medu di ratu. Kel dia, nha Txika sai na rua numa forsa ta grita:
– Ai!!! Ai!!! Ai!!!
Se vizinha di nomi Txontxa, spantada, purgunta-l:
– Nha Txika, kuze ki kontise ki nha sa ta kore ta grita asi?!
– N odja ratu tras di un bidon di midju!
– Eh! Nha Txika, si nha kre, N ta da-nha un gatinhu. Nha gata tevi, ka dura li, un monti gatinhu.
– N kre, sin! Nhordes na seu ta paga-nha! – agradese Nha Txika.
Kel gatu, sima el ba ta kria, ba ta mata kada bes mas ratu. Na! Ratus parti dentu kasa di nha Txika, propi. Ba ti te, ratus kaba. Nha Txika fika ton kontenti ki bira ta da gatu txeu kumida ti gatu bira pizadu i lentu.
Pasa uns tenpu. Un dia, parse un ratinhu dentu kaza. Gatu fika tras di kel ratinhu ta kore pa riba pa baxu pa tenta pega-l.
Kuza ki ta salbaba kel ratinhu, era se atenson, distansia ki el ta prokuraba mante di gatu, sperteza, rapides, kapasidadi di da kurva faxi, ta skiva gatu. Gatu, asves, ta daba kabesa na paredi i otus obstakulu trokadu kes finta ki ratinhu ta daba-el. Mas kuza ki mas ta salbaba ratinhu era kes un monti buraku ki tenba na pe di paredi, konbinadu ku faktu di el ratinhu ser inda pikinoti – istu e, el ta kanbaba na tudu gretinha. Ratinhu ta konsigiba entra nuns gretinha ton stretu, ton stretu, ki gatu ta tenba difikuldadi ti di mete se pata.
Kel dia, dipos di odja kel ratinhu ta kapri se gatu keridu, nha Txika fla:
– Axa, bu ka sa ta pode pega nen kel ratinhu la! Dja bu bira gordu. Oxi, N ka ta da-bu kumida!
Npos fomi da gatu. Gatu fika ta smira ratinhu. Kel ratinhu torna parse. Gatu kore tras del, mas ratinhu konsigi soti dentu di un greta. Gatu tenta mete pata, mas el ka konsigi. Sima gatu staba xeiu di fomi, el disidi xinta dianti kel greta pa spera ti ratinhu sai.
Dipos di txeu spera, ratinhu kuda ma gatu dja ba se kaminhu pabia, ti ki ratinhu entraba na greta, gatu ta speraba un bokadinhu so, ta dizistiba normalmenti i ta baba brinka. Nton ratinhu ben pa saida di buraku pa ben djobe si inda gatu staba la. Sima el ponta kabesa, e si ki gatu, zas, salta riba se kabesa. Mas, sima gatu staba ku txeu fomi, el ka spera pa korpu di ratinhu sai sufisienti di greta i tanbe ratinhu staba ku atenson. Di manera ki ratinhu konsigi futi i entra di novu na greta.
Gatu odja ma kel spiki di xinta spera ratinhu sai di greta ka ta daba obra – si, antis, ratinhu ta benba pa saida ku kudadu, go ki txoma ratinhu al fikaba sienti. Nton gatu sai ku otu sperteza:
– Aun, aun, aunnnn! – gatu uba, bu ta fla katxor.
– Dios grasa, dja parse un katxor pa salba-m! – pensa ratinhu, ki staba dja ku fomi dipos di tantu tenpu dentu kel greta.
Konfianti ma katxor dja kore ku gatu di frenti greta undi el ratinhu staba, ratinhu ben, des bes sen kudadu, txiga na saida di greta, sai. Sima el sai, e si ki gatu, zas, salta, pega-l ben pegadu! Kantu gatu dja teneba ratinhu na stangu, el ba bazofu deta na ragas di nha Txika ki staba kontenti di odja ma se truki di ka da gatu kumida sa ta daba rezultadu. Sima nha Txika kore-l mo si, e si ki gatu fla, xeiu di bazofaria:
– Nes mundu globalizadu, konxe txeu lingua e inportantisimu! Gosi, kel ki ka e poliglota, sta tramadu!
Sapatinha rubera riba, sapatinha rubera baxu, kenha ki sabe mas, konta midjor!
Marsianu nha Ida padri Nikulau Ferera
