Por: Marciano Ramos Moreira*
Era un bes na un vila, tenba un padri ki txomaba padri Palu. Es padri dja tenba mas di 20 anu na kel vila. El ta trataba tudu algen dretu i tudu algen kreba-el txeu. Dipos di uns anu na kel vila, es padri Palu nota ma mudjeris kazada di kel vila ta parseba-el na konfesionariu manenti ta fla-l modi ki es staba ton arependida pabia dja es poba ses maridus txifri.
Nton, un sertu dia, padri Palu sai ku un manera menus salbaxi di fla “N komete pekadu di adulteriu”: na nves di un mudjer fla “N po nha maridu kornu”, padri Palu fika ta rekomenda kes mudjer pa fika ta fla “N ntridja pe na rua”.
Poku tenpu dipos, spreson “N ntridja pe na rua” i se signifikadu spadja pa kel vila. Dipos di uns anu, spreson dja staba popular non so entri mudjeris mas tanbe entri tudu adultu di kel vila.
Bira si, padri Palu duense gravi. Es leba-l faxi-faxi pa ospital nun otu ilha. Bai, pa substitui padri Palu, un joven padri, ki txomaba padri Pedru.
Ta kontise ki ningen ka splika padri Pedru kuze ki signifika spreson “N ntridja pe na rua”.
Nton, na primeru dia di konfison, parse la un mudjer kazada ki fla padri Pedru:
– Sinhor padri, N ka durmi es noti so na pensa na nha pekadu. N sta mutu arependida!
– Deus e klementi, fidja! Deus e mizerikordiozu!
– Ti ki N fika ta pensa na nha pekadu, ta da-m so gana txora so di arependimentu!
– Sin! Fla-m ki pekadu ki bu komete! Paxenxa di Nhor Des e infinitu!
– Sinhor padri, N ntridja pe na rua!
– Ah! Ka bu fadiga! Kel la ka e un pekadu gravi. Kel la ta kontise! Deus ta perdua-bu. Ba reza 1 “Nos Pai” ku 2 “Ave Maria”, dipos bu ba kaza. Djobe undi bu ta po pe!
Mas sima dias ba ta pasa e si ki bira ta parse mas mudjeris na konfison ku es mesmu diskursu – “N ntridja pe na rua”. Nhu padri ba ta konsola kes pekadora ma “ntridja pe na rua” ka e pekadu gravi. I, pa konpostura, nhu padri Pedru fika ta da-s un penitensia mutu mas lebi ki kel ki padri Palu ta daba-es: so 1 “Nos Pai” ku 2 “Ave Maria” txaskan!
Mudjeris fika konvensedu ma es padri joven e mas liberal. Na! Mudjeris arma abri agu na es negosiu di “ntridja pe na rua” propi!
Dipos di algun tenpu, nhu padri komesa ta fika preokupadu ku integridadi fiziku di ses ovelha femia – es staba so na ntridja pe na rua un stiku bai. Duranti un festa di lokalidadi na meiu di txeu dignitariu di vila, padri Pedru formula se apelu a Sinhor Prizidenti di Kamara rixu:
– Sinhor Prizidenti, N ta pidi-nho pa nhu da un jetu na kalsadas di paseius di es ruas di vila pabia mudjeris sta so na ntridja pe na rua un bes bai! Tudu bes ki N da konfison, txeu di es ta parse-m la ta konfesa-m ma es ntridja pe na rua, ma es ntridja pe na rua. N sta preokupadu propi!
– Ah! Ah! Ah! Ah! Ah! Ah! Ah! Ah! – Prizidenti di Kamara po na ri boka abertu, ta da gargalhadas, lagua ta baza, ka ta para.
– Ka nhu ri, nau, es kuza e seriu! Si nhu ka toma midida, un monti mudjer ta fika manku nes vila! – xatiadu si, padri Pedru reaji.
– Ah! Ah! Ah! Ah! Ah! Ah! Ah! Ah! – Prizidenti di Kamara kontinua ta ri boka abertu, ta da gargalhadas, lagua ta baza, ka ta para.
– Dja N fla-nho ma es kuza ka e brinkadera! Alias mudjer di Prizidenti tanbe pode fika manku – el ki sa ta ntridja pe mas txeu!
Marsianu nha Ida padri Nikulau Ferera
