Por: Marciano Ramos Moreira*
Era un bes, tenba 2 kunpadri ki ta staba senpri djuntu tudu fin di simana. Ses nomi era Txiku Iaia i Ntoni Txéka. Es kria djuntu i dja es staba ku mas di 50 anu na korpu. Kunpadris era amigu di ses kopu. Es ta baba senpri pa mesmu bar di bairu toma ses pingu.
Un dumingu, banda 4 ora di tardi, Txiku Iaia i Ntoni Txéka txiga ses bar preferidu. La di porta, Ntoni Txéka da ordi pa dona di bar:
– Txutxa, traze-nu li 2 grogu pa nu ben konpo kabesa!
Txutxa ben sirbi-s faxi, rostu kontenti, ku 2 kopinhu na ratxa dedu mon skerda i se garafa di grogu na kel otu:
– Boa-tardi, fregezis! Modi nhos sta? – purgunta Txutxa, ki ba ta po-s kada un kel dozi di kustumu.
– Nu sta dretu! Abo, Txutxa, N ka meste purgunta-bu: dja N odja, dentu bu rostu, ma bu sta sabi, rixu i balenti. – kudi Ntoni Txéka.
Txiku Iaia korta-s konbersu:
– Mas, kunpadri Ntoni, nos, nu ka deta djuntu! Pamodi nhu sa ta risponde pa nos 2? Npos nhu dexa-m fla-nho gosi: N durmi mal, ku un dor na petu ta ben, ta bai.
– Kunpadri Txiku, anho, nhu ten saudi di feru. Desdi ki nu era mininu ti gosi, nunka N odja-nho duenti. Ka nhu fadiga, inda nhu ta ntera-m!
– Fregezis, nhos dexa di papia na duensa ku morti! Ninhun di nhos ka sa ta more gosi. Imajina si Nhordes ta dexa-m sen nhas midjor freges?! Kuze ki N al faze sen nhos, an?
– Txutxa, ka bu fadiga, bu ka ta perde benda. Ti ki N more, nha kunpadri Txiku ta fika ta toma pa mi ku el. Grandis amigu, nen morti ka ta sipara-s! E ka si, kunpadri Txiku?
– E sima nhu fla, kunpadri Ntoni! Nos amizadi ta ben desdi kriansa! Konbinadu! Si N more primeru, kunpadri Ntoni ta fika ta toma, di kada bes, 2 kopinhu grogu – 1 pa nho i 1 pa mi.
– Ben. Ami e tistimunha! – mas animada ku es perspetiva di se benda ka baxa, Txutxa rabida fla-s.
Infilismenti, uns tenpu dipos, bira si, Txiku Iaia ben more di un ataki di kurason.
Dipos di misa di mes, inda tristi, Ntoni Txéka torna fika ta ba tudu fin di simana pa bar di Txutxa. Sima el konbinaba ku se kunpadri Txiku Iaia, tudu bes ki el pidi grogu, el ta iziji Txutxa pa sirbi-l na 2 kopinhu – pa el i pa se difuntu kunpadri Txiku. Ntoni Txéka ta fikaba na un meza el-so, ka ta papia ku ningen, ta djobe pa se 2 kopinhu xeiu di grogu se frenti. El ta fikaba ta tra un golpi di un kopu i, a sigir, un golpi di kel otu ti el seka tudu 2 kopu.
Ntoni Txéka ten un monti di anu na kel brinkadera. Di manera ki, dipos di algun tenpu, ti ki el txigaba bar di Txutxa, el ka mesteba nen pidi – Txutxa ta benba sirbi-l senpri 2 kopinhu di grogu di kada bes.
Mas, txiga un dia ki kuzas muda! Kel dia, Ntoni Txéka txiga bar di Txutxa i Txutxa, sima di kustumu, ben ku 2 kopinhu pa ben sirbi Ntoni Txéka. Dipos di intxi primeru kopinhu, kantu Txutxa bai komesa intxi sugundu kopinhu, Ntoni Txéka pega-l garafa pa tadja-l di baza grogu:
– Para, Txutxa! Di oxi pa dianti, bu ta pasa ta sirbi-m so un kopinhu di grogu di kada bes.
– Mas, Ntoni Txéka?! I kel prumesa ki nhos faze kunpanheru, bo ku difuntu Txiku Iaia, nha frenti?! Bu ta toma grogu bo-so, Txiku Iaia ta rabida na koba trokadu bu falsia!
– Nau! Nau! N ka sa ta prega nha difuntu kunpadri falsia! Ami, dja N dexa di bebe. Es grogu e so pa nha difuntu kunpadri!
Marsianu nha Ida padri Nikulau Ferera
