Por: Marciano Ramos Moreira*
Era un bes na un familia, tenba maridu, mudjer i un fidju femia. Maridu txomaba Toku nha Txika i spoza, nha Txika. Fidju femia txomaba Txuka. Omi ku mudjer dja staba ku 40 i tal anu di idadi riba la ta bai. Minininha staba ku 19 anu di idadi.
Toku staba ku uns rexa pa la, dia ta sai, dia ta entra. Mudjer fika ta insisti pa Toku ba ospital konsulta. Dipos di txeu insistensia di nha Txika, se maridu kaba pa ba mediku.
Mediku manda faze alguns analizi. Na fin, diskubridu ma Toku tenba un kankru, ki dja staba avansadu. Sa ta restaba-el pokus mes di vida. Mediku manda txoma se mudjer ku se fidju femia i aviza-s.
Na primerus dia dipos di Toku sabe di se distinu, el fika kabisbaxu, tristi, ka ta papia ku ningen i ka ta sai di dentu se kasa. Se familia ta tenta alegra-l, mas sen susesu.
Dipos di serka di un mes na kel stadu, Toku odja ma era midjor tenta goza kel poku tenpu di vida ki resta-l:
– Nha Txika, ki tal nu organiza un festa?
– N ta pensa ma e bon ideia, Toku.
– Nu ta konvida nos parentis i amigus mas prosimu?
– Sta dretu.
Gentis pripara kel festa me. Na spasu di alguns simana, dja staba dja tudu priparadu pa festa. Na, festa bedju! Konvidadus staba tudu sabi. Kumida i bibidas a vontadi! Badju finkadu! Gentis ta badja, ta resta damas un stiku bai.
Duranti tudu tenpu di priparason di festa, konvidadus ta staba ta prokura sabe pamodi ki Toku ku se familia sa ta organizaba kel festa, mas ningen di familia di Toku ka fla-s nada. Toku ku se familia konbina, antesipadamenti, risposta pa es tipu di purgunta:
– E surpreza! Nhos ta fika ta sabe dentu festa.
Konvidadus staba la sabi kontu ka ten. Mas tudu es staba kuriozu pa sabe motivu di kel festa. Kantu madrugada txiga, alguns konvidadu kumesa ta kre ba kaza, mas es ka kreba bai antis di sabe pamodi Toku ku se familia organiza kel festa bedju. Konvidadus kumesa ta insisti pa Toku fla pamodi:
– Oh Toku, bu kre mata algen di kuriozidadi?! Fla pamodi bu organiza es festa li pabia sonu dja da-m! – insisti un di kes konvidadu.
Kes otu konvidadu sai ku faze koru:
– E ora! E ora! E ora, e ora, e ora!
Toku nha Txika odja ma el ka podeba adia revelason di se segredu mas:
– Sta ben! Sta ben! Kaluda! Atenson pabia N sa ta ben fla es segredu li so un bes.
Tudu algen kala, paradu muzika, kabu bira ian:
– N sta ku SIDA. N ten so alguns mes di bida.
Festa more kel ora! Alguns mudjer rinka txoru. Kes konvidadu mas sklaresidu bira ta bai, na bixa, nbrasa Toku ku se familia. Dipos di nbransa-s, kada un fika ta djobe kabu di xinta pa pensa na kel tristi surpreza. Poku tenpu dipos, konvidadus fika ta sai un, un. Sai, sai ti ki kaba fepu.
Kantu konvidadus bai moku, familia di Toku kumesa pripara pa ba deta. Nha Txika staba rai di kansadu trokadu priparason di kel festa, di modi ki el ba deta primeru. Toku, di novu tristi, sai na varanda pa toma ar. Se fijdu femia Txuka ba papia ku el la na varanda:
– Mas, papa, pamodi bu ka fla konvidadus verdadi? Pamodi bu ka fla-s ma bu tene kankru? Imajina, bu djobe seu, bu djobe tera, bu ba skodje justu SIDA! Duensa ki algen ten medu del! Txeu algen ta pensa ma SIDA e mas kontajiozu ki na verdadi el e.
– Txuka nha fidju femia, na mumentus difisil sima kes ki nu sa ta vive gosi li, nu ten ki uza kabesa! – Toku nha Txika fika ta rapika dedu indikador na se testa pa riforsa se afirmason.
Dipos di alguns sigundu, Toku kontinua:
– Bu sa ta odja modi bu mai sta inda krintxa: ta anda, ta rabola koxa? Nes altura di kanpionatu, N ten ki tadja pa es kaza ka bira un entra sai di omis tras di nha mudjer. Nen bo bu ka ta gostaba di sta na un kaza di es. Npos tudu omi di es lokalidadi ta fika ta pensa ma N tene SIDA. Asi, es ta fika lonji di nha mudjer. Ti ki N more, el ta fika en pas!
Marsianu nha Ida padri Nikulau Ferera
