Por: Marciano Ramos Moreira*
Kel dia banda 6 ora tardi, Txiku Xuma, omi di ses 50 anu di idadi, entra na igreja matris di aldeia di Txuba Txobe, ba na pe di altar, finka duedju na primeru digrau di skada, po na reza ku tudu devoson. Kel uma salon di igreja, kel ora, staba baziu. Kabu staba ian – ton silensiozu ki, si muskitu buaba, algen al podeba obi.
Nhu padri staba na sakristia – un sala kontiguu di salon di igreja. Txiku ka da konta ma nhu padri staba dentu sakristia. Na verdadi, Txiku kuda ma el staba dentu igreja el so ku Deus na seu. Di manera ki Txiku nen ka tenta reza baxinhu. Enfin nhu padri sa ta obiba se reza la di sakristia.
Txiku, dipos di reza un Nos Pai i 7 Ave-Maria, sai ku fla Nhordes kuze ki, na verdadi, leba-l igreja na kel boka noti:
– Nhordes, ami e kaixeru di nhu Toti Donga. Ontordia, nha primu Betu Xubenga parse-m la na kaza ta kexa falta di dinheru pa kunpra ramedi pa se fidju femia. N da-l npristadu 2 kontu di dinheru di kaixa di taberna nhu Toti Donga. Mas, ti inda, nha primu Betu Xubenga ka konsigi bende se djaki Polon. I, manhan sedu, nhu Toti Donga ta ba da-m balansu. Nes 12 anu komu kaixeru, nunka N fika alkansadu. N ka sabe modi nhu Toti Donga ta riaji si el atxa ta falta 2.000$. Oh Nhordes di seu, es kriston sta rokadu! Nhu salva-m di zimola!
Dipos di obi tudu kel orason i konbersu di Txiku Xuma ku Deus, nhu padri fika ku tantu pena di Txiku ki el rezolve djuda Txiku. Nhu padri konta tudu dinheru di piditorius, batizadus, kazamentus i misas pa difuntus. Nhu padri teneba so 1.800$. Nton nhu padri fla se kabesa:
– Pa Txiku e mas fasil ranja so 200$ di ki 2 kontu… Dexa-m da-l kel ki Dios da-m. Kenha ki da kel ki el ten, mas ka ta speradu.
Nhu padri ben pa Txiku ku rostu kontenti:
– Nha fidju, Dios e milagrozu! Bu pidi ku fe, Dios obi-bu bu pididu!
Nhu padri longa Txiku un sakutelinhu xeiu di muedas ta klinklin. Txiku, spantadu ku nhu padri ki, bira si, parse sen el spera, toma sakutelinhu faxi, po na beja mon di nhu padri i na agradese Deus:
– Dios e grandi! Nhordes ka ta dexa se fidju rokadu!
A sigir, ku lagua na odju, Txiku larga mon di nhu padri, labanta tudu 2 brasu pa altura, komesa ta reza inda ku mas fervor pa agradese Deus. Nhu padri sai di igreja, ba kaza kontenti di kel karidadi ki dja el kaba di faze.
Na fin di agradesimentu, Txiku dismara boka di kel sakutelinhu ki nhu padri da-l, baza muedas na txon, komesa konta.
Txiku, ki staba rostu kontenti ta konta, kantu el txiga fin di kontajen, el konstata ma tenba so 1.800$ dentu sakutelinhu. Txiku fika transtornadu pabia el staba konfianti ma Deus dja daba-el kel 2 kontu ki el da se primu Betu Xubenga npristadu.
Txiku, dipos di un monti di anus ta trabadja komu kaixeru na taberna di nhu Toti, staba bon na konta dinheru. Mas el diskunfia di se kabesa pabia Nhordes ka podeba dexa-l more na praia – el torna konta. Enfin el ka eraba na primeru kontajen – sakutelinhu tenba so 1.800$. Inda Txiku staba alkansadu di 200$, ki el ka sabeba modi ranja.
Tristi, Txiku djunta se dinheru, po tudu na sakutelinhu, mara-l boka, da ku duedju na txon, djobe pa santu na altar, fla ku firmeza na vos:
– Nhordes, di prosimu bes, ti ki Nhu ta da-m dinheru, Nhu da-m na nha mon. Ka Nhu ten ki da nhu padri pa da-m. Nhu padri tra-m 200$!
Marsianu nha Ida padri Nikulau Ferera
