Por: Marciano Moreira*
Kel dia, sodadi fronta Kakoi i el rizolve ben la di stranjeru sen aviza se txutxinha, pa faze-l un surpreza.
Kakoi, omi di ses 40 i tal anu di idadi, sa ta voltaba pa tera dipos di serka di un anu di se ultimu stada na tera di feria, feria ki el apruveita pa kaza ku Mari.
So ki Mari, minina bunitinha i di ses 20 i tal anu di idadi, sen aviza Kakoi, abandona lar disel ku Kakoi uns 3 dia antis di Kakoi txiga tera:
– Mari ba pa Praia es dias li. – Motx aviza Kakoi, enkuantu Kakoi staba so na konko na porta di kaza disel ku Mari.
– Pa Praia?! – riaji Kakoi inkredulu, pois el sabeba ma Motx ta odia-l, pabia Mari ta namoraba ku Motx kantu el Kakoi, grasa a fama di emigranti di susesu, konkista Mari.
– El bai ku un koperanti. Ale li bilheti ki el dexa-bu. Bu konxe se letra. Li ki ta fazedu i ki ta pagadu… Bu toma-m-el, koperanti dja toma-bu-el! – sklama Motx ku alegria.
Kantu Kakoi le bilheti, el xinti txon ta treme. Pa el ka kai, el xinta lapu na txon, soris ta baza.
Di prupozitu, Motx sa ta papiaba rixu pa txoma atenson di vizinhansa. Nobidadi spadja sima rastilhu di polvura. Antis di xuxu sfrega odju, gentis dja djuntaba sima barexa pa odja dizusperu di un omi xeiu di txifri.
Nobidadi bai ti txiga obidu di Ninaja, irmon di Kakoi. Ninaja ben faxi pa ben risgata Kakoi di kel vergonha. Ku ajuda di un amigu, Ninaja leba Kakoi pratikamenti karegadu pa kaza di el Ninaja.
Kantu Kakoi rekupera di sustu, el disidi ben Praia pa Mari splika-l odju na odju razon di es grandi falsia.
Kantu Kakoi txiga Praia, el ba dretu kaza di irma di Mari, ki dja duraba ta mora li na Praia. Es irma di Mari informa Kakoi ma Mari dja subi latxi stranjeru ku un koperanti. Nen enderesu el ka dexa, pois irma po mal ku Mari, trokadu forma ingratu ki Mari sa ta trataba Kakoi – un maridu izenplar i ki sa ta daba-el un vida di prinseza.
Kakoi pasa mal tamanhu! El ki staba ben di vida, dipos di uns 20 anu na stranjeru na bon enpregu komu maritimu. El ki kreba se txutxinha txeu pa fronta!
Kakoi futi.
Duranti un monti tenpu i tudu dia palmanhan sedu, Kakoi ta baba Portu di Praia pe na txon i ta fikaba sakedu ta odja pa altu mar tan duranti uns minutu, sima ki el sa ta spera algun barku. Di sigida, el ta benba farol Maria Pia pe na txon, undi el ta fikaba riba ponta di un falezia ta djobe pa baxu, ta longa kabesa pa djobe midjor, sima ki kai-l algun kuza la dibaxu na karaka. I el ta fikaba la tanbe duranti alguns minutu ta ripiti kes muvimentu di kenha ki sa ta djobe algu ki perde-l i, na fin, el ta baba se kaminhu.
Txiku era guarda na imediasons di kaminhu ki ta da pa farol Maria Pia. Duranti un monti tenpu, Txiku odja Kakoi tudu dia di palmanhan sedu ta ba Portu di Praia i ta ben farol Maria Pia, tudu ku pe na txon. Mas, ki sa ta intrigaba Txiku mas, era kel djobe la fundu karaka ki Kakoi ta fikaba ta djobe ku npenhu:
– Mas, kuze ki kel omi la sa ta djobe ku tantu npenhu?! – Txiku fika ta purgunta se kabesa duranti un monti tenpu.
Kel dia, kuriozidadi fronta Txiku. El disidi ba fika ladu a ladu ku Kakoi pa el diskubri kuze ki Kakoi sa ta djobeba la dibaxu.
El txiga, el komesa ta djobe. Kakoi nen ka liga-l. Kakoi kontinua ta djobe la dibaxu.
Dipos di algun tenpu ta djobe sen odja nada, kuriozidadi toma konta di Txiku:
– Mas, kuze ki nhu ta ben djobe lisin tudu santu dia?!
Ku ar di surpreza, Kakoi ñuli-l i, ku boka nfanhidu, risponde-l:
– Mos, bo e ardigadu! Ami ki dja ten un monti di tenpu ta ben tudu dia pa N ben djobe i ti inda N ka sabe kuze ki N sa ta djobe… Bo, gosi ki bu txiga, dja bu kre diskubri!
*Marsianu nha Ida padri Nikulau Ferera
