Era un bes, tenba un pulisia di tranzitu ton mansu, ton mansu, ki sima el ka tenba di Santanton kanba Djabraba. Se nomi era Djuze pulisia. Pa tudu kondutor ki ta fazeba kuza ki ka debe na strada, Djuze ta daba un sugundu xansi i konsedju. Pratikamenti, nunka el ka ta daba multa. Na verdadi, el era mansu ti di mas.
Xefi di Djuze kumesa ta fika priokupadu ku Djuze. Nton, se xefi fika ta manda-l, kada bes, pa lugaris ki ses kolega ta daba mas multa. Mas, nada fetu – Djuze ta voltaba senpri di mon baziu.
Xefi fika ta txoma Djuze atenson, mas ka da obra. Xefi prumove kolegas di Djuze i dexa Djuze sen prumuson – mesmu asin se trabadju ka midjora. Nton, kel dia xefi aviza-l, xatiadu si:
– Djuze, ka bu nborka-m nha kaneka! Ta fladu bixeru mansu ta mama na tudu mai, mas pulisia e ka trabadju pa bixeru mansu! Si bu ka toma ton, ton ta toma-bu! N sta dentu kore ku bo!
Txiga un pontu ki xefi kaba pa dizanima i fla Djuze pulisia, na kel palmanhan:
-Djuze, dja ten txeu tenpu ki bu sta na lugar ki mas ta dadu multa. Entritantu, ti gosi, nunka bu da ninhun xofer multa. Di-bo e di mas! Kenha ki ka ta obi, tudu ta odja! N kre-bu txeu, mas, enbora ta fladu ma figera ta panha pedrada trokadu se fidju, ami go N ka ta tradu di sirvisu trokadu bo! Oji, si bu torna volta-m di mon ta bana, N ta kore ku bo di sirvisu!
Kel palmanhan, Djuze ba se postu di trabadju priokupadu. Mas, Djuze staba sen sorti kel dia – tenba pokus karu na strada i tudu kondutor ki el para, staba dentu lei. Sima ora di volta pa Skuadra ba ta fika mas pertu, e si ki Djuze ba ta fika kada bes mas inpasienti.Txiga ora di volta pa Skuadra i nada di multa. Pasa ora i Djuze fika ta reza pa parse un di kes kondutor fora di lei. Mas, nada, nada! Dja dizanimadu, el resebe un tilifonema di se xefi ta da-l 1 ora pa el parse na Skuadra. Kuandu dja el staba ta da rinkada pa Skuadra ku lagua na odju, e si ki Djuze pulisia odja un padri ta ben divagar, divagarinhu na se mota.
Era padri Pedru. Un padri mutu rispetador di lei, ku mas di 60 anu na korpu. Padri Pedru ta trataba tudu algen dretu, di manera ki tudu algen kreba-el txeu.
Djuze pulisia disidi ma se familia ka podeba fika na rua di amargura, sendu el Djuze uniku enpregadu dentu se kaza. Nton, Djuze faze sinal di stop pa padri Pedru:
-Sinhor padri, sinhor padri, nhu para! Nhu para di favor!
Padri Pedru para, Djuze toma benson i fla-l sen norostia:
-Sinhor padri, ta due-m txeu, mas nhu sta multadu.
Sinhor padri Pedru konxeba Djuze pulisia ben. El sabeba ma Djuze ka ta da xofer multa sinamas. Ti konsedju sinhor padri kustumaba da-l – pa el ser menus banana, pabia moleza di mas ta rizulta na mas asidentis i na mas sufrimentu. Di manera ki sinhor padri fika spantadu:
-Mas, nha fidju, pamodi ki bu ta ben da-m multa si mi nada N ka faze? N sa ta benba dretu, na santu pas, mi ku Deus!
Djuze ka staba na el – so el sabeba ma el ka podeba afronta se familia di kel manera ku perda di enpregu. Nton, Djuze, ku kara rufadu, vos firmi, volta pa sinhor padri i fla-l:
-Npos, sinhor padri sta multadu, sin sinhor! Deus sta sen kapaseti!
Sapatinha rubera riba, sapatinha rubera baxu, kenha ki sabe mas, konta midjor!
*Marsianu nha Ida padri Nikulau Ferera
