PUB

Colunistas

Nu ben konta partis: Ti nha kaza pasa nha frenti

Por: Marciano

Dja staba banda 3 ora di un madrugada frientu di sesta-fera pa sabadu. Kel ora noti na rua Txiku Iaia, un rua largu i kunpridu, ka staba ningen nen ta anda na kaminhu di kaza o di trabadju nen sakedu na konbersu dispidida parodientus kifari xintadu ta konta partis. Tudu ian! Sidadi staba kalmu. So di ves en kuandu, bu ta odja un o otu karu ta pasa pa riba pa baxu.

Pa ser izatu, na kel ora di madrugada na rua Txiku Iaia, so 2 pulisia sa ta kunpriba ses diver di guarda-nu – nos ku nos averis. Pulisias sa ta andaba divagar, ta djobe pa ndreta, spia pa skerda, odja pa frenti i da ku rabu di odju pa kosta. Ta bai ti te ta sakedu pa sumara tenpu. Es pulisias ka kreba ganha na ka-kusta, es ka kreba da kasubodentus ninhun xansi…

Na kel patrulha di rua Txiku Iaia, nos amigus pulisia sa ta baba na pas di Deus kantu, bira si, es rapara un vultu. Distanti, staba un pesoa xintadu lapu na paseiu djuntu di un posti di lus. Pulisias ben ku pasu firmi, mas divagar, ku un mon na pistola tudu priparadu i inda dentu koldri, rakuadu di kunpanheru, un mas pa frenti, kel otu la tras, ku tudu kudadu, ti txiga bera di es pesoa.

Kantu pulisia di frenti, di nomi Txeka, fika uns 8 metru di individu solitariu, el obi es individu solitariu ta papia el so, bu ta fla el sa ta diskutiba ku algun algen. Txeka fika ta pensa ma, afinal, el sa ta aprosimaba di un mokeru o dun dodu. Di kualker manera, el fika ku menus medu. Txeka fla pa se boton:

– Prigozu, el ka debe ser, xintadu lapu na txon ta papia el so…

Txeka ba ta txiga mas pertu di konbersador solitariu divagarinhu, enbora ku menus medu, mas inda ku se dedu na gatilhu, ta djobe atentamenti pa kualker movimentu prigozu.

Kantu Txeka dja staba djuntu di es individu solitariu, el xinti txeru di alkuol. Nton, Txeka kumesa diskunfia ma el staba frenti di un inofensivu gateru:

– Bon dia!

– Bon dia?! Bu ka odja ma inda sta sukuru! Mos, sikadjar bu sta moku, bu sa ta kuda lus di es posti e sol?! An? – inda ku rostu na txon, riaji individu solitariu ku falar di un pesoa boka na txon, sima ki el sa ta djobeba algun kuza.

– Kontise algun kuza ku nho pa nhu sta lisin nho so altas-ora di noti?

– Eh! An, anho e pulisia?! – gateru sklama, dipos di arma labanta kara un bokadinhu.

– N pode djuda-nho? Kuze ki kontise ku nho?

– Nada! Sinhor pulisia, nada!

– Nton, nhu kre pa nu djuda-nho ba kaza di-nho?

– Nha kaza, sinhor pulisia?! Omi, nha kaza dja perde, sima ki dja el soti na tera burbur! Dja N djobe-l tudu djobe N ka sa ta serta ku el na ninhun kabu.

– N ta ntende… Mas, e prigozu sta lisin es ora nho so. Fora kel li, nhu pode panha frieza si nhu fika dentu di es jiada. Nhu spera N djuda-nho labanta, pa nu ba djobe kaza di-nho. – Txeka Pulisia pega-l di pa tras djuntu sobaku pa tenta labanta-l.

– Nau! Nhu dexa-m! Ka nhu fadiga, sinhor pulisia. Modi ki nhu txoma propi? Nho e omi dretu! Nhu ta trata algen suguru, dentu kaminhu.

– Nu ka debe faze ningen mal, pabia maldadi, si nu ka almusa-l, nu ta djanta-l. Es ta txoma-m Txeka Pulisia. Txeka pa sirbi-nho! Nhu labanta pa amor di Deus! Nu ba djobe kaza di-nho!

– Ka meste, sinhor Txeka Pulisia! Nu ta ba djobe-l dibaldi. Dja N kansa di djobe nha kaza pa sisi. Pur isu, N rizolve xinta lisin. N sa ta spera-l lisin!

– Modi algen ta spera se kaza?!

– Eh! Sinhor Pulisia, es ka fla ma tera ta jira?

– Sin…?!

– Nton?

– Nton, kuze?

– Tera ta jira, ta jira, ta jira i mi N ta fika paradu lisin ti nha kaza pasa nha frenti pa N labanta frakati, salta dentu del txapu!

Marsianu nha Ida padri Nikulau Ferera

Publicada na edição semanal do jornal A NAÇÃO, nº 722, de 01 de Julho de 2021

PUB

PUB

PUB

To Top