Por: Marciano Ramos Moreira*
Na un sabadu banda 22 ora, bar di Txeka nha Preta staba ta ferbe di algen sima txitxaru na redi. Rapazis staba ta papia rixu, ta jestikula, bu ta fla es staba na gera. Na verdadi, na roda di kada meza, staba uns 5 o 6 pesoa xintadu, ku ses bibida pa frenti, ta diskuti – uns ta diskuti futibol, otus ta diskuti pulitika o ta konta partis.
Dentu kel, txiga uma omi grandi, tamanhu sima Boboxi. Ningen dentu kel bar ka konxeba kel omon ki kababa di entra. Kabu, di rapenti, bira ian – barulhu para, tudu algen fika kaladu ta djobe kel forasteru.
Anpos! Era Txiku di Nhonho, rapas di ses 30 i tal anu di idadi, ki mudaba pa nos bairu kel dia. Txiku ka fika mutu kontenti ku kel situason di tudu algen ragaladu nel. El ntia-s, el avansa pa balkon, kara pa frenti, pasu firmi, petu labantadu sima un jeneral. El da soku na balkon pa mostra se raiba, el fla rixu:
– Un whisky!
Bu ka ta akridita! Kel omi di serka di 2 metru di altura i ku serka di 200 kilu, afinal, tenba un vozinhu di un minininha di 10 pa 11 anu di idadi!
Gentis na bar ratxa grasa!
Txeka nha Preta volta pa Txiku di Nhonho, fla-l:
– Ami, li na nha bar, N ka ta sirbi algen ku vos di kriansa bibida alkuoliku! Alias e proibidu sirbi kriansas bibida alkuoliku. Ba treina papia ku vos di omi, bu ben manhan, N ta sirbi-bu whisky di grasa.
Txiku di Nhonho riaji, ku si vozinhu xatiadu, ta ñuli Txeka manenti:
– Nhu dexa di nosentesa, nhu sirbi-m!
Kes rapas mas forti i matxikadu labanta di mezas, ben di gangan pa balkon:
– Forasteru, bu ka obi kuze ki Txeka fla-bu inda!? – purgunta un di kes mas matxikadu ku jetu di algen ki kre gera.
– Mas midjor nhos afasta! Sinon N ta ba toma nha katxoron pit bull gosi li! – kudi Txiku di Nhonho.
– Bai! – riaji un di kes rapas.
Txiku di Nhonho ka perde tenpu: el sai di bar uas!
Pokus minutu dipos, Txiku di Nhonho entra bar di novu ku uma katxoron se tras. Na verdadi, gentis, kantu flaba forasteru pa ba toma katxor, es pensaba Txiku di Nhonho sa ta kontaba ka-si. Mas Txiku tenba un katxoron di me disisu! Tudu algen fika ku medu. Txiku di Nhonho, kantu el odja medu stanpadu na kara di gentis, el volta bazofu pa se katxoron, un pit bull ku uma santa maria di boka pretu i ku petu sima boi:
– Bobi, ladra!
– Aaauunn! Aaauunn! Aaauunn! Aaauunn! – Bobi ladra ku un vos di katxorinhu. Na! Nen katxorinhu propi – bu ta fla un xaninha!
Gentis ratxa grasa! Txeu di es panha koraji kel ora, labanta, ben pa katxoron ku ar di ben ataka-l! Bobi spanta, sai di dentu di bar uas ku rabu na meiu di patas trazeru. Txiku di Nhonho sai xola tras di Bobi.
Na sabadu siginti na mesmu ora, Txiku di Nhonho txiga bar di Txeka nha Preta:
– Un whisky! – el fla ku uma vozon, bu ta fla kantador di opera Luciano Pavarotti.
– Asi sta dretu – vos di omi! Dja bu ganha whisky di grasa! – Txeka riaji kontenti.
Tudu kes prizenti i ki staba la na bar na sabadu anterior, fika admiradu. Afinal, insistensia di Txeka dja da obra – forasteru sa ta papiaba sima un matxu! Es da palma di kontentamentu!
Txeka nha Preta kumesa sirbi Txiku di Nhonho whisky. Kantu Txeka kaba po un whisky duplu, el purgunta Txiku:
– Ku jelu o sen jelu?
Bu ka ta akridita! Di novu, Txiku di Nhonho risponde, ku jetu di kenha ki staba ku burgonha, na vos di minininha di 10 pa 11 anu di idadi:
– Kel la, N ka treina fla inda.
Marsianu nha Ida padri Nikulau Ferera.
