Por: Marciano Ramos Moreira*
Txiga sidadi un sirku famozu. Se fama era ton grandi ki el fama txiga sidadi txeu tenpu antis di sirku. Gentis, prinsipalmenti minis, teneba gana pa txiga data di xegada di sirku. Kantu sirku txiga, noba kore sidadi di ponta pa ponta nun uas. Un monti di algen ba odja spetaklu. Gentis staba enkantadu ku maravilhas di kel sirku. Na meiu di spetaklu, parse un domador di lion ku se lion. Domador staba la ta brinka ku kel lion sima ki lion e un katxor, mas di kes mansinhu.
Txiga un pontu ki domador mete se kabesa dentu kel bokona di lion. Kantu domador odja ma spetadoris staba tudu odju ragaladu i boka abertu so di adimirason, el domador volta pa publiku i faze sinal pa algen ki ten koraji sima el domador, ba brinka ku lion tanbe.
Na meiu di spetadoris, staba Txiku Bia. Txiku Bia, di ses 30 anu di idadi, era un mos balenti i bazofu. Kantu domador dizafia spetadoris, da Txiku na kabesa di mostra ma el e rei di balenti. Konvensedu ma kel lion dja bira sima un katxoron sorna, Txiku labanta, bai ku petu abertu, onbru labantadu, pasu di gladiador, xeiu di bazofaria pa arena. Gentis di sirku reia ponta di un korda, Txiku prinda nel. Gentis di sirku isa Txiku i dixi-l na sentru di arena. Kantu Txiku staba kuazi ta txiga txon, el larga korda. Txiku da na txon van, da lion spanta. Lion ruji sima struvon di setenbru ku tenpu nbernadu! Lion po na djobe pa Txiku tan. Lion raganha denti, baxa kabesa na txon, djendje pa tras, fika ta ben pa Txiku na pasu di kasador divagar. Kantu Txiku odja ma ti domador dja spanta i sa ta afasta pa un kantu ku medu, Txiku bira ta treme sima bara berdi.
Txiku staba na meiu di arena. Txiku poi pe na mama kadera, santa uma karera, rostu pa redi di arena. Kore, txiga na redi, gadanha nel. Mas redi era ton altu ki Txiku ka sa ta konsigiba gadanha ti sai riba pa bua pa fora di arena.
Na kel fadiga, futifuti pa li, futifuti pa la, Txiku torna kai dentu di arena. El kai ki el kai, el da uma karera, tudu djuntu di redi, pa lonji di lion. Lion kumesa ta kenta pasu tras di Txiku, boka raganhadu, ta ruji manenti manenti. Dentu faxi, pesual di sirku bota ponta korda pa Txiku prinda nel. Txiku salta na korda sima un gatu, trepa na korda sima un makaku, numa forsa. Mas, rapidu, lion konsigi txiga djuntu di undi Txiku staba ta subi na korda. Lion tenta salta pa riba. Mas kantu lion ba tenta salta ku bokona abertu, na ves di el subi pa altura, el lolo, da kel bokona na txon van! Lion fika ta striba pa labanta, ta lolo, ta kai, ta tufudja, bu ta fla el sta riba di un kamada skoregadiu di jelu.
Timenti lion sa ta loloba ta kai, Txiku ganha tenpu, trepa na korda, subi, gentis di sirku kaba isa-l ti pasa redi i reia-l pa fora di arena. Mas Txiku staba dizariadu di tantu medu. Sima el kai pa fora di arena, e si ki el da uma karera pa fora di sirku.
Na rua, sima Txiku staba ta kore ta djobe pa tras, e si ki el ba da nkontron ku se amigu Txontxa van. Txontxa, forti sima rotxa, suste xoki i, spantadu, pega Txiku ku forsa, purgunta-l:
– Txiku, abo?! Pamodi bu sa ta kore asi, sima ki dja bu odja xuxu?!
– E lion!!! E lion!!! – Txiku risponde ku difikuldadi trokadu di folgu kansadu.
– Kuze?! Lion dja kapri?! – purgunta Txontxa, el tanbe dja ku gana kore, xeiu di medu.
Txiku faze Txontxa sinal pa spera-l toma ar un bokadinhu. Kantu Txontxa odja ma Txiku ka sa ta tenta kore, el Txontxa tanbe fika mas kalmu.
Kantu Txiku rekupera spritu, el konta se amigu Txontxa kuze ki pasa dentu di sirku. Txontxa, ku odju ragaladu, riaji:
– Mos, bu sta pa bo ki e bo, mas oxi dja bu odja berdi! Nunka N odja algen ton kurajozu sima bo! Si era mi, gosi N al staba tudu kokodu!
Txiku ponta dedu pa pe di se kalsa, ki staba boradu di pupu, purgunta-l:
– Na kuze ki bu pensa ma lion sa ta loloba…?!
Marsianu nha Ida padri Nikulau Ferera
