Por: Marciano Ramos Moreira*
Era un bes li na Praia, tenba un padri ki tenba un papagaiu. Papagaiu era mutu spertu. Sabidu ki, sima el, ka tenba na ninhun parti di Kabu Verdi. Kel papagaiu ta papiaba dentu linha – bu ta fla nhu padri se donu.
Di tantu odja se donu ta telefona, kel dia, da papagaiu gana di telefona tanbe. Papagaiu dexa nhu padri sai pa ses afazer di relijion, el telefona pa algen li dentu di Praia. Kel dia, el konxe papia pa telefoni ku Txiku, un kriansa se amigu i amigu di nhu padri.
Kantu nhu padri volta pa kaza, papagaiu fika ku medu ma nhu padri ta diskubri i sai ku sota-l. Mas nhu padri ka fla papagaiu nen po nen pedra. Nton papagaiu konklui ma el pode telefona sen nhu padri da konta. Dipos di es diskuberta, papagaiu nbala na telefona. Tudu dia, el fika ta telefona non so pa Txiku mas tanbe pa otus amigu di nhu padri ki el papagaiu tanbe konxeba. Alias tudu kenha ki ta baba kaza nhu padri manenti, bira amigu di kel papagaiu.
Algun tenpu mas tardi, mudjer di sakriston, di nomi Txika, staba na konbersu ku nhu padri na sala. Dentu kel, papagaiu entra. Papagaiu skese ma, kel dia, dja el papiaba dja ku nha Txika pa telefoni. Papagaiu fla nha Txika mantenha sima di kustumu:
– Bon dia, nha Txika! Oji, modi nha sta di korpu?
– Eh!? Papagaiu, nu kaba di konbersa pa telefoni kuazi gosi, modi ki bu sa ta ben kunprimenta-m sima ki, oji, inda nu ka papiaba!? – riaji nha Txika ku tudu mimu pa papagaiu.
– Konbersa pa telefoni?! – purgunta nhu padri spantadu, ta odja, ku rostu runhu, pa papagaiu.
Papagaiu da konta ma dja el mete pe na argola, el kore faxi pa kuzinha. Nton nha Txika ntende ma, afinal, papagaiu sa ta konbersaba pa telefoni sukundidu di nhu padri:
– N sa ta brinkaba ku papagaiu di-nho, nhu padri. – riaji nha Txika ta tenta konpo stragu…
Nhu padri ka insisti trokadu idukason. Mas el fika ku un pulga tras di oredja. Kantu mudjer di sakriston sai, nhu padri txoma papagaiu i da-l ki-nau:
– Nha Txika kre guarda-bu segredu, mas provavelmenti bu sta so na telefona i ta aumenta-m dispeza ku telefoni. Ka bu telefona mas! Ki atrevimentu! Si algen torna fla-m ma bu telefona-l, N ta kastiga-bu! Dja bu obi!?
Papagaiu po kabesa na txon, el ba ketu pa se gaiola la kuzinha. El entra i fitxa porta. Kel dia, el ka sai mas di gaiola nen el ka da un piu so medu.
Pasa mas un tenpu. Di novu, torna da papagiu gana telefona. El pensa, el pensa, el konklui ma si el telefona algen ki ka ta papia ku nhu padri, ningen ka ta ben fla nhu padri nada. Nton papagaiu disidi telefona la pa lonji, la Tarafal. Koinsidi ki, na primeru telefonema, risponde-l un kriansa di ses 9 anu di idadi, di nomi Txuka. Txuka fika enkantada di pode papia ku un papagaiu pa telefoni. Nton es konbina, entri otus kuza, pa ses konbersu pa telefoni fika un segredu entri es.
Konfianti ma nhu padri ka ta diskubri se segredu, na kel mes, papagaiu nbala na telefona pa se amiga tarafalensi. Na mes siginti, Telecom manda un fatura gordu. Nhu padri informa djuntu di Telecom sobri motivus di aumentu di dispeza. El diskubri ma algen sa ta telefonaba manenti manenti pa Tarafal so na oras ki el padri ta staba fora di kaza. Nton, kel dia, nhu padri finji ma el sa ta ba ses afazer di relijion, dispidi ku tudu amizadi di papagaiu, sai. Pokus minutu dipos, nhu padri volta pa porta kintal. Kantu el txiga sala, el atxa papagaiu so na konbersa pa telefoni:
– Txapu txokoleta, dja N pega malandru! Spera, papagaiu atrevidu! N flaba-bo pa bu ka telefona. Na nves di bu obi ku mi, bu disidi faze pior inda: bu disidi telefona pa lonji, ki ta kusta inda mas txeu. Oji, N ta kastiga-bu! Si bu telefonaba li pertu (dentu Praia), N al poba-bo di kastigu so 1 dia. Mas, sima bu telefona pa lonji (la pa Tarafal), N ta po-bu 2 dia di kastigu.
Nhu padri pega penas di kada aza di papagaiu djunta i prega nun krus pikinoti, ba la altar di se kuartu, koloka papagaiu krusifikadu na paredi, ladu a ladu ku Jezus.
Alguns minutu mas tardi, Jezus volta kara pa papagaiu, fla-l:
– Nha Pai ta da kriston so kastigu ki el pode ku el. Reza ku fe, bu kastigu ta kaba faxi.
– Obrigadu, Jezus! – risponde papagaiu tristi i dizanimadu.
– Kantu tenpu ki bu sa ta ben fika li? – purgunta Jezus.
– 2 dia, Jezus Kristu. Mas, Jezus, dja dura ki N sa ta odja-bu krusifikadu. Kantu tenpu ki dja bu ten krusifikadu? – purgunta papagaiu ku konpaxon.
– 2 mil anu. – risponde Jezus rezignadu.
– Jezus, abo, bu telefona pa Japon?!
Sapatinha ribera riba, sapatinha ribera baxu, kenha ki sabe mas, konta midjor!
Marsianu nha Ida padri Nikulau Ferera
