Por: Marciano Moreira*
Na un dia di tenpu kenti, xeiu di sol i kalor, sen bentu i ku mar kalmu, pa banda 11 ora, txeu rapazinhu staba ta toma banhu na mar na Portu di Sidadi-Velha. Tudu algen staba sabi, ki mas di ki si ka tenba na ninhun kabu di es Kabu Verdi, di Ilha di Montanhas kanba Ilha di Floris!
Di rapenti, parse na orizonti un objetu vuador, rapidu sima xintidu – sima el parse di lonji ta ben, antis xuxu sfrega odju, dja el staba riba nos kabesa. Era stribilin riba la na seu ti ta treme txon baxu nos pe!
Es objetu vuador era ton grandi, ton grandi sima zipilin – el ta parseba ku avion, mas e ka tenba azas. El era sima kes kanu gros di agu, so ki ku mas di 20 metru di diametru i mas di 100 metru di kunprimentu, tudu branku, ku txeu janela di vidru, ku frenti kurvadu pa baxu i 4 turbina diresionavel – 2 di kada ladu di bariga.
Es navi para tan na ar, para paradu sima riloji, bu ta fla fransedja na seu! Asin ki el para, un lantxona branku futi del, pa se frenti kurvadu pa baxu, po ta dixi del isadu na un monti di kordas. Po ta dixi, ta dixi tantu faxi, bu ta pensa sa ta kai. Kantu es lantxa ta txiga na mar, el ba ta riduzi velosidadi, mas, si me, el da na mar, pan, dadji agu spadja.
Kel lantxa da na mar djuntu ku da rinkada, numa forsa, pa tera, na nos direson! Mutor di lantxa sa ta fuliaba agu pa tras, na altura. Lantxa staba ta ben tantu faxi, ki kuazi el ka sa ta xintaba na agu, sima pexi-vuador – tas, tas, tas, ta salta riba di agu. Kel lantxa era di buraxa, patalaxa dentu di agu.
Sima kel lantxa ba ta txiga pertu di Portu, si ki nu ba ta da konta ma el staba xeiu ti boka di algen, fardadu ku un farda di kor azul marinhu. Gentis na lantxa era branku sima leti-l kabras Nene, kabelu branku albu, sima skuma di ondias di mar ti ki rabenta na karaka. Na prinsipiu, nu pensaba ma era omis bedju. Mas, afinal kes genti dentu-l lantxa ka era bedju, nau. Es era so nhakus di rapazis, xintadu petu fora sima tropa na formatura, kada un ta suste un arma riba ragas, na uns 6 renki di banku transversal, kada renki ku uns 4 pesoa, ta djobe pa nos tan, mudu, rostu runhu. Na popa, xintadu djuntu ku omi na lemi, tenba inda un omi mas altu ki kes otu, tudu ku binokulu na odju, ta djobe pa li, ta djobe pa la. Na proa tenba un metralhadora miodu, kanu kunpridu, ki un otu omi sa ta mudaba di direson, ta faze pontaria ora pa riba ora pa baxu ora pa ndreta ora pa skerda. Nton, minis grita:
-Invazonnn!!! Invazonnn!!! Invazonnn!!!
Tudu algen po pe na mama kadera, da un xuati pa Rua Kadjeu! Ta kore, ta grita invazon. Dentu kel, nu obi un vos altu i klaru ta sai, nos tras, di altifalantis di un karu paradu frenti Skola Portu Baxu:
-Nhos odja rapides di nos nobu Guarda Kostera!!! E ka invazon, nau! E treinu! E si ki nu ta fika ta pega, sen da-s tenpu di fuji, tudu kasta di trafikantis – di droga, di algen, di arma, etc.! Ka ten tadju! Nu ta po-s moku na linha! Bonbena ku es fepu! Nhos pode spadja es noba li!
Kantu sustu pasa-nu, rapazinhus da bason ma, dentu kel karu paradu, staba gentis ku kameras di televizon ta filma manenti. Nton, minis bira ator dentu faxi. Kel ora tudu es fika balenti, sima Ranbu:
-Mas, ami go, N ka teneba medu. N sa ta baba, na karera, toma nha maxin pa N pika-s pikadinhu, pikadinhu sima toresma di nha Txontxa! – bazofia Txatxi, di petu labantadu, ta mostra punhu.
-Bo propi ki ta pika-s! Odja modi ki bu sa ta treme sima bara berdi! Korason ba-bu dedinhu pe! Rapas, pega kexada, era so un brinkadera! – txakotia Txontxon.
-Ami, N ka sa ta txoraba, nau. N sa ta koreba, ta grita pa txoma Pulisia la San Sibastion pa ben mostra-s undi motxa ta mora! – izibi Txeka.
-E ka-si – el e kobardu! Odja se korpu seku, kodjon di kalson modjadu, so xixi! – xuxa Txitxu!
Minis kontinua na mesmu toada, kada un ta da un diskulpa pa kel fuga i gritaria – ti ki karu sumi di la. Na kel noti ningen ka fadja Telejornal di 20 ora – ti ki enfin, dja nu tenba atoris na roda!
(Sapatinha rubera riba, sapatinha rubera baxu, kenha ki sabe mas, inventa midjor!)
*Marsianu nha Ida padri Nikulau Ferera
