Por: Marciano Moreira*
Na anus 30 di sekulu XX li na Sidadi-Velha, tenba un papagaiu linguaradu, salbaxi i kunfiadu. Se nomi era Txiku. Papagaiu Txiku normalmenti ta staba na se puleru na sala djuntu janela pa el podeba da fe di kuzas ki ta pasaba dentu kaza i na rua.
Ses donu (nha Txuka ku Djon) tenba un fidju matxu di nomi Zeka. Djon ta staba na trabadju la Praia Santa Maria da Vitória. El ta baba trabadju antimanxe i ta benba na boka noti. Nha Txuka ta bendeba bolu. El ta fazeba un monti di bolu ki el ta guardaba na un lata.
Kel dia, Zeka rizolve ba furta bolu pa el ba da kolegas ki staba ta spera la na rua so na spreta. Lata ku bolu ta staba na sala. Kantu papagaiu ntende kuze ki Zeka kreba faze, el grita:
– Txuka! Txukaaa! Ale Zeka ta tra-bu un monti bolu na lata!
Nha Txuka ben numa forsa di kuzinha:
– Mas, Zeka, pa ke ki bu meste tudu es bolu?! Bu pensa ma kel li ki e almosu o ke!? Da-m, stangu largu! Ago, bu ta fika sen nada. – nha Txuka rabata bone di Zeka ki staba xeiu di bolu. Nha Txuka ka ntende ma bolus era pa da kes minis, pabia el ka txiga di odja-s. Minis santa uma karera kantu es xinti nha Txuka ta ben di kuzinha.
Zeka sai xeiu di raiba di papagaiu. Na ta sai, el ñuli papagaiu, el fla-l baxinhu:
– Oji, bu ta paga-m, linguaradu!
– Txukaaa! Txuka, Zeka fla ma el ta lonba-m!
– Bu ka ta dadji nel li! – nha Txuka fla Zeka, ku rostu amiasador.
Dipos, nha Txuka volta pa papagaiu, el kontinua:
– Si el sota-bu, bu ta fla Djon ti ki el ben di Praia. Ti ki Djon purgunta-m, N ta fla-l ma bu ka konta ka-si. Asi, Djon ta konpo-l korpu.
Djon gostaba txeu di se papagaiu. Djon ka ta kreba pa ningen maltrata se papagaiu. Zeka sabeba ma, si el mexe ku papagaiu, papagaiu ta ba da kexa del na Djon, se mai Txuka ta konfirma kexa i el Zeka ta pasaba mal di me disisu. Trokadu kel li, Zeka dexa papagaiu ketu na se kabu kel dia.
Un otu dia, pasa un sinhora di nomi Txutxa na rua. Txutxa txoma un otu pesoa, ki staba nun otu len, pa fla ma el odja gentis di fora ta ben la Santa Marta, ku karga na kabesa i na burus. Gentis di fora ta kustumaba ben Sidadi-Velha bende kuzas di tera – sima sabon di purga, azeiti purga, karvon, lenha, etc. Papagaiu obi. El txoma nha Txuka la kuzinha:
– Txuka, Txukaaa! Ale gentis di fora la ta ben, pa ben bende bobra! Ale-s la Santa Marta ta ben! Ba Rua Kadjeu faxi, bu ba kunpra-m bobra la Pilorinhu pa ben ferbe.
Na kel mumentu la kuzinha, staba djuntu ku nha Txuka un vizinha di nomi nha Pontxa i ki ta odjaba mariadu i so ku un odju. Vizinha sai ku mete ku papagaiu:
– Bu sa ta konta ka-si! Modi ki bu odja gentis ta ben la Santa Marta si, di li di es kaza, ka ta odjadu Santa Marta?! An?! Fla-m la!
– Oh kolola atrevida! Bu pensa ma mi e sima bo ki ka ta odja dretu!? Ami, N sabe tudu kuza ki ta pasa! Kel ki N ka odja, N ta obi algen ta konta. Txuka, dexa di norostia: bai gosi li kunpra-m bobra! Bai nun uas antis kaba!
Ku burgonha di nha Pontxa, Txuka fla papagaiu:
– Txiku, gentis grandi ka ta kobadu! Dja N fla-bu ma e ka bun kantu bes, mas bu ten kabesa rixu. Oji, bu ka ta skapa! Ti ki Djon ben, N ta fla-l. El ta da-bu uma soti pa bu prende rispeta gentis grandi!
– Ka nha fadiga, vizinha! E animal – el ka ten kabesa. – interve nha Pontxa, tanbe enbarasada.
Na kel mumentu, algen txoma ta aviza nha Txuka ma gentis di fora sa ta dixiba na San Bras karegadu di kuzas di tera pa bende. Nton, papagiu, xeiu di mural, fla:
– Txuka, dja bu odja ma N ten razon?! Ba kunpra-m bobra antis di kaba. Bai!
Txiga un dia, ben la di fora gentis pa ben pasa festa di Natal ku donus di papagaiu. Pa Natal na Sidadi-Velha na kel tenpu, ta tenba festa bedju, ku matina, badju gaita, batuku, pikapada, korida di kabalu i otus diverson. Entri vizitantis, ben un rapariginha. Minininha, di nomi Txunbin, xixi kama. Papagaiu obi gentis ta rue. Papagaiu fika ta kanta na se puleru, ta fla, ta ripiti rixu ki pesoas ki sa ta pasaba na rua sa ta obiba:
– Txunbin porka / xixidera kama / labanta ketu / ba Lagoa / kalsinha modjadu / bate kalsinha.
Djon, xatiadu, da papagaiu ordi:
– Txiku, kala boka! Kunfiadu!
Papagaiu riaji, ku ar di algen salbaxi:
– El ka xixi kama me!?
Xeiu di burgonha, mosinha fika ta txora, nega sai na rua nen pa ba misa na kel dia di Natal.
Enfin, Djon tenba txeu pasiensia ku kel papagaiu. Na verdadi, Djon kunpra-l trokadu se salbaxaria: nun festa Nossa Senhora da Graça la Praia, kantu Djon sai di misa, el ba ta pasa na Prasa, el odja un kaxeru viajanti ku un monti kuza ta bende, inkluindu 2 papagaiu:
– Kas ki e presu di kes papagaiu la? – Djon purgunta.
– Presu ta varia konsuanti abilidadis di kada un. Mas baratu e kel li ki so sabe koba. – kaxeru viajanti ponta dedu pa papagaiu Txiku. I dipos, el ponta dedu pa kel otu:
– Mas karu e kel li ki, ti ki el tene fomi, el ta txora; ti ki el sta ku sedi, el ta reza.
Djon fika entuziasmadu. Nton, el purgunta:
– Mas, kuze ki kel mas karu la ta faze ti ki el ka tene nen fomi nen sedi?!
Nton, papagaiu Txiku korta konbersu:
– Ah?! Ka sta-bu klaru?! El ta kanta, pateta!
*Marsianu nha Ida padri Nikulau Ferera
Publicada na edição semanal do jornal A NAÇÃO, nº 780, de 11 de Agosto de 2022
